Ака уйăхěн  25 – мěшě – чăваш чěлхи кунě, чăваш халăхне çутта кăларакан ашшěн хисеплě çынни – И.Я.Яковлев çуралнăранпа 170 çулхи юбилейě. Çак паллă юбилея паллă тума вěренекенсемпе вěрентекенсем, хăнасем шкулти акт залне пуçтарăнчěç. Чăвашла сăвă-юрă янăрарě, чăваш ташши куçа илěртрě. Пуçламăш класра вěренкенсем И.Я.Яковлев калавěсем тăрăх сценкăсем хатěрленě. Викторина ыйтăвěсем çине те хуравларěç ачасем. 3 – мěш класра вěренекен Антон Краснов юрласа, ташласа, юмах каласа пурне те тěлěнтерчě. Унăн «Чăваш хуплăвě» презентаципе реклами те питě интереслě те кăсăклă пулчěç. И.Я.Яковлев пурнăçěпе пултарулăхě халаласа  шкулти библиотекарь, Солдатова Л.Н., презентаци кăтартрě, выставка йěркелерě. Мероприяти И.Я.Яковлев чăваш халăхне панă халалěнчи тěп саманчěсемпе 7 – мěш класс ачисем паллаштарнипе вěçленчě. «Ку пилсене Иван Яковлевич ěмěрлěхе çырса хăварнă. Эсир те, ачасем, унăн халалěсене асра тытăр, вара пурнăçăрта йăнăшсем те сахалтарах пулěç», - тесе вěçлерě И.Я. Яковлев 170 çул тултарнине халаланă каçа Р.В.Якуркина, чăваш чěлхипе литературине вěрентекенě.