1966 çулта Тĕмерти вăтам шкулăн 11 класĕнчен вĕренсе тухнисен тĕлпулăвĕ иртрĕ 2016 çулхи июнĕн 17-мĕшĕнче. Тĕлпулăва 11-ĕн пухăнтăмăр тата пирĕн класс ертỹçи пулнă Ольга Трофимовна Ямщикова та пычĕ. Асăннă шкулта пире унăн директорĕ А.А.Николаева, математика вĕрентекен Н.В.Большова тата 5-мĕш класс ачисем тарават кĕтсе илчĕç.

            Фойере вĕренсе тухнисен сăн ỹкерчĕкĕсемпе вĕсен кĕске биографийĕсене çырса кăтартнă стенд йĕркеленĕ. Унпа паллашнă хыççăн шкулти партăсем хушшине лартăмăр та, тахçантанпах кĕтнĕ тĕлпулăва пирĕнпе пĕрле 1966 çулта вăтам шкул пĕтернĕ, çак шкултах 35 çул ачасене пĕлỹ парса "Халăха вĕрентес ĕç отличникĕ" ята илнĕ Зоя Ивановна Яцыкова уçрĕ. Шкул директорĕ А.А.Николаева тĕлпулăва пухăннисене пурне те ăшшăн саламларĕ тата çирĕп сывлăх, тепĕр 5 çултан та çак йышпах тĕл пулма ырă сунчĕ. Н.В.Большова ертсе пынипе 5 класра вĕренекенсем концерт кăтартрĕç. Унтан пурте пĕрле шкул историйĕ çинчен фильм пăхрăмăр.

            Ăшă калаçусемпе аса илỹсем шкул столовăйĕнче малалла тăсăлчĕç, чейпе сăйлантăмăр кунта. Зинаида Александровна Латыпова суту-илỹ тытăмĕнче 30 çул ытла ĕçленĕ. Унăн ăсталăхĕ те кирлĕ пулчĕ кунта. Пурнăçран вăхăтсăр уйрăлнă юлташăмăрсене асăнса пĕр минутлăха шăп тăрса чысларăмăр. Унтан хамăрăн класс ертỹçи пулнă О.Т.Ямщикова ăшă сăмах каларĕ, çакăн пек манăçми тĕлпулăва йĕркеленĕшĕн тав турĕ, пурне те ăнăçусем, вăрăм кун-çул сунчĕ. З.И.Яцыкова юлашкинчен пурне те "Тĕмерти вăтам шкултан 1966 çулта вĕренсе тухнисем. Аллă çул иртнĕ хыççăн" альбом парнелерĕ.

            Тĕлпулура чăваш тата вырăс юррисем те янăрарĕç. Ку енĕпе уйрăмах Мария Сергеевна Кузнецова маттур пулчĕ. Баянпа музыка шкулĕн преподавателĕ Илья Иванович Совин хавхалантарса пычĕ.

            Нумайлăха асра юлĕ çак ăшă тĕлпулу.

И.Н.ФЕДОРОВ,

1966 çулта Тĕмерти вăтам шкулăн 11 класне вĕренсе пĕтернĕскер