Кăçал та Тĕмерти пĕтĕмĕшле вăтам пĕлỹ паракан шкулта ĕçпе кану тата профильлĕ лагерьсем ĕçлеççĕ. Сывлăха çирĕплетмелли лагерьте 1-5 классенчен 20 ача канать. Профильлине 6-8 классенчен 15 ача çỹрет.

            Сывлăха çирĕплетмелли "Тюмерландия" лагере çỹрекенсен канăвĕ усăллă ирттĕр, асра юлтăр тесе лагерь пуçлăхĕ Н.Большова, В.Мюресовапа Е.Романова воспитательсем тăрăшса ĕçлеççĕ. Вĕсем программа çырса хатĕрленĕ. Кашни ирех музыкăпа зарядкăна тухаççĕ, апат çинĕ хыççăн планпа палăртнă спорт вăййисем, пĕлĕве, тавракурăма тарăнлатмалли конкурссем, мероприятисем, тренингсем иртеççĕ. Лагерьте 16 арçын ача. Икĕ ушкăна пайланса футболла выляма кăмăллаççĕ вĕсем.

            Лагерĕн пирвайхи куннех ачасем Тăвайри 45-мĕш номерлĕ пушар чаçне çитсе курчĕç. В.Михайлов ачасене пушар хăрушлăхĕ çинчен тĕплĕн ăнлантарчĕ.

            Пушар машини çине ларса та, пушарта тăхăнмалли тумтирпе пулса курчĕç. Çирĕп сывлăхлă яшсем çеç пушар хуралĕнче ĕçлеме пултарнине ăнланчĕç.

            Ачасен кунне халалланă уяв та асра юлĕ. Тĕрлĕрен конкурссенче, спорт ăмăртăвĕсенче хутшăнса пылак çимĕçсем çĕнсе илчĕç. Концерт курса киленчĕç. "Аль" ФСКпа бассейнра та ăшшăн йышăнчĕç "Тюмерландия" лагере çỹрекенсене. Çапла пĕр кунта таçта та çитме ĕлкĕрчĕç.

            Ачасене малалла театр, музей, тĕрлĕрен спорт вăййисем кĕтеççĕ. Лагерĕн шутлă кунĕсем усăллă иртессе шанас килет.

                                                                                                                                                                                     Н.БОЛЬШОВА.