Çакăн пек хак пачĕ Тĕмер ял тăрăхĕн пуçлăхĕ вырсарнире иртнĕ волейбол турнирĕ пирки. Ăмăртусем Тĕмер шкулĕн спортзалĕнче иртрĕç.

Волейболла выляссипе районти уçă турнира 5 команда хутшăнчĕ. Мероприятие шкул директорĕ А.А.Николаева уçрĕ. Вăл çак ăмăрту пуçаруçисене тата спонсорне Сергей Хумышева пĕтĕм чун-чĕререн тав сăмахĕ каларĕ. Тен, хăйсем вĕреннĕ шкула юратнăран пулĕ, С.В.Хумышев, М.В.Хвостов тата А.В.Хумышев вăййа ирттермелли вырăна тăван ялне суйласа илчĕç. Сăмах май каласан, шкулта вĕреннĕ чухнех вĕсем спортпа туслă пулнă. Районта çеç мар, республикăра та пĕр хутчен кăна мар мала тухнă. Ачисене те вĕсем спорта юратма вĕрентнĕ. Акă, Сергей Витальевичăн аслă ывăлĕ Станислав Олимп резервĕн шкулĕнче йĕлтĕрпе чупассипе çитĕнỹсем тăвать.

Район администрацийĕн пуçлăхĕн çумĕ Валерий Чайкин, ял тăрăхĕн пуçлăхĕ Геннадий Иванов, спорт ветеранĕ Петр Иванов вăййа хутшăнакансене саламларĕç, çитĕнỹсем сунчĕç. Пĕртăван Хумышевсем, хресчен фермер хуçалăхĕн ертỹçи Борис Алексеев хăйсен сăмахĕнче ырă йăлана малалла аталантарма чĕнсе каларĕç. Вĕсем çитес вăхăтрах спортпа çыхăннă мероприятисем татах та ирттерес кăмăл пурри çинчен пĕлтерчĕç.

Турнира "Иваново" тата "Тĕмер çамрăкĕсем" командăсем пуçларĕç. "Иваново" команди 2:0 шутпа пĕрремĕш çитĕнỹ турĕ. "Ураскассипе" "Тĕмер ветеранĕсем" командăсем хушшинче те хĕрỹ иртрĕ вăйă. Камсем çĕнтересси виççĕмĕш вăйăра çеç паллă пулчĕ. 2:1 шутпа "Тĕмер ветеранĕсем" выляса илчĕç. Виççĕмĕш вăйă та иккĕмĕшĕнчен пĕрре те кая пулмарĕ. Тĕлĕнмелле ăста выляççĕ çамрăксем. "Буяново" команда "Ураскассинчен" 2:1 шутпа выляса илме пултарчĕ. Тăваттăмĕш вăййа Тĕмер çамрăкĕсемпе ветеранĕсем тăсрĕç. Ветерансем маттур, 2:0 шутпа çĕнтерчĕç. Çамрăксен командинчи Андрей Жилкин ветерансене ырăпа çеç асăнчĕ. "Çулне кура мар хастар. Пирĕн те спортпа туслă пулмалла, тренировкăсене час-часах çỹремелле, ытти çамрăксене явăçтармалла", - терĕ.

Турнир хĕрсе те хĕрсе пычĕ. "Буяново" "Ураскасси" командăна, "Иваново" "Тĕмер ветеранĕсене" 2:1 шутсемпе, "Ураскасси" команди "Тĕмер çамрăкĕсене" 2:0 шутпа, "Буяново" "Тĕмер ветеранĕсене" 2:1 шутпа çĕнтерчĕç. Çапла вара 1-мĕш вырăна "Буяново", 2-3-мĕшсене "Иваново" волейболисчĕсем тата "Тĕмер ветеранĕсем" йышăнчĕç. Çĕнтерỹçĕсене медальсем, кубок тата укçан преми парса хавхалантарчĕç.

Çак турнира ирттерме укçа-тенкĕпе пулăшнă хресчен фермер хуçалăхĕн ертỹçине Сергей Хумышева тав сăмахĕ калатпăр, ĕçре, пурнăçра çитĕнỹсем, çемьере килĕшỹ, юрату сунатпăр. 2016 - Ĕç çыннин çулталăкĕ. Çак вăййа хутшăннисем тĕрлĕ çĕрте тăрăшаççĕ. Ĕçре те, çав вăхăтрах спортра та çитĕнỹсем тăваççĕ.

Хăнасене М.Роштова, Н.Воробьева поварсем, шкул завхозĕ Г.Катякова вĕри апатпа сăйларĕç.

А.НИКОЛАЕВА. Тĕмер шкулĕ