Тĕмер шкулĕ хăнасене кĕтсе илме яланах хавас, тарават. Ак кăçал та, нарăс уйăхĕн 7 – мĕшĕнче, хăтлă шкула тĕрлĕ ялсенчен спорта юратакан çамрăксемпе ветерансем пуçтарăнчĕç. Паян шкулта пысăк мероприяти – волейболла выляссипе районти уçă турнир иртет. 5 команда çак спорт вăййине хутшăнма кăмăл турĕç. Мероприятие шкул директорĕ А.А.Николаева уçрĕ. Вăл çак вăййа пуçарса яракансене тата спонсорсене пĕтĕм чун - чĕререн тав сăмахĕ каларĕ. Тен, тăван шкула юратнăран пулĕ, çак шкултан вĕренсе тухнă çамрăксем М.В.Хвостов, С.В.Хумышев тата А.В.Хумышев вăййа ирттерме тăван яла суйласа илчĕç. Сăмах май каласан, шкулта вĕреннĕ чухнех çак çамрăксем спортпа туслă пулнă. Вĕсене районта çеç мар, республикăра та пĕлнĕ. Ачисене те вĕсем спорта юратма вĕрентнĕ. С.В.Хумышевăн аслă ывăлĕ Станислав Олимп резервин шкулĕнче йĕлтĕрпе чупассипе çитĕнÿсем тăвать.
Районти администрацин пуçлăхĕн çумĕ В.В.Чайкин, Тĕмер поселенийĕн пуçлăхĕ Г.И.Иванов, спорт ветеранĕ П.А.Иванов вăййа хутшăнакансене саламларĕç, çитĕнÿсем сунчĕç. Пĕртăван Хумышевсем, Б.Л.Алексеев хăйсен сăмахĕнче ырă традицие малалла аталантарма чĕнсе каларĕç. Вĕсем çитес вăхăтрах спортпа çыхăннă мероприятисем татах та ирттерес кăмăл пурри çинчен пĕлтерчĕç.
Волейбол турнирне «Иваново» тата «Тĕмер çамрăкĕсем» командăсем пуçларĕç. «Иваново» команди 2:0 шутпа пĕрремĕш çитĕнÿ турĕ. Питĕ хĕрÿ иртрĕ вăйă «Уразкассы» тата «Тĕмер ветеранĕсем» командăсем хушшинче. Хăш команда çĕнтересси виççĕмĕш вăйăра çеç паллă пулчĕ. 2:1 шутпа «Тĕмер ветеранĕсем» выляса илчĕç. Виççĕмĕш вăйă та иккĕмĕшĕнчен пĕрре те кая пулмарĕ. Тĕлĕнмелле вăйлă вылярĕç çамрăксем. «Буяново» команда «Уразкассы» комадăран 2:1 шутпа выляса илме пултарчĕ. Тăваттăмĕш вăййа Тĕмер çамрăкĕсемпе ветеранĕсем тăсрĕç. Ветерансем çамрăксемшĕн ырă тĕслĕх пулса тăчĕç. Вĕсем 2:0 шутпа çĕнтерчĕç. Çамрăксен командин членĕ Андрей Жилкин вăйă хыççăн панă интервьюра ветерансем çинчен ырăпа çеç асăнчĕ. «Ветерансем çулне кура мар хастар. Пирĕн те спортпа туслă пулмалла, шкула тренировкăна час-часах çÿремелле», - вĕçлерĕ хăйĕн сăмахне Андрей.
Турнир хĕрсе те хĕрсе пычĕ. «Буяново» «Уразкассы» командăна 2:1 шутпа, «Иваново» команда «Тĕмер ветеранĕсене» 2:1 шутпа, «Уразкассы» команди «Тĕмер çамрăкĕсене» 2:0 шутпа, «Буяново» команди «Тĕмер ветеранĕсене» 2:1шутпа çĕнтерчĕç. Çапла вара выляса пĕтнĕ хыççăн çакă палăрчĕ: вăйлă командăсем хушшинче те çĕнтерÿçĕсем пулаççĕ. 1-мĕш вырăна «Буяново», 2-мĕш вырăна «Иваново», 3-мĕш вырăна «Тĕмер ветеранĕсем» командăсем йышăнчĕç. Çĕнтерÿçĕсене медальсем, кубок тата укçан парса хавхалантарчĕç.
Çак вăййа ирттерме укçа – тенкĕ енчен пулăшакансене: КФК «Хумышев» ертÿçине С.В.Хумышева, ИП «Хумышев» предпринимательне А.В.Хумышева, КФХ «Алексеев» ертÿçине Б.Л.Алексеева, КФХ «Михайлов» ертÿçине С.Н.Михайлова пысăк тав сăмахĕ калатпăр, ĕçре, пурнăçра çитĕнÿсем, çемьере килĕшÿ, юрату сунатпăр.
2016 – мĕш çул – ĕç çыннисен çулталăкĕ. Çак вăййа пуçарма тата ирттерме хутшăннă çынсем тĕрлĕ хуçалăхра вăй хураçăĕ. Ěçре те, çав вăхăтрах спортра та çитĕнÿсем тăваççĕ.
Пур хăнасене те Тĕмер шкулĕн поварĕсем М. Роштова, Н.Воробьева, шкул хуçалăхĕн заведующийĕ Г.А.Катякова вĕри апатпа сăйларĕç.